立法會議員下個月初會同環境局官員一齊去南韓首爾，考察當地嘅減廢經驗。不過立法會呢班鴨仔團大大話話有十八人，三、兩個人行開行埋唔知去咗邊都好麻煩。
身兼呢個立法會考察團團長嘅環境事務委員會主席何秀蘭（Cyd）就話佢一個人照顧唔到咁多個，已經委託秘書處幫手成立WhatsApp群組，有走失時搵鴨仔都易啲喎。
立法會南韓鴨仔團仲有約一個星期就出發，有人已講明會遲到早走，有人就對喺當地嘅膳食安排要求多多。Cyd呢排就忙於籌備，由考察時會議嘅發言時間，至食飯安排都要諗過度過。講到餐單安排，Cyd就連聲稱煩︰「當地啲餐廳通常細細間，加上時間又緊迫，坐低先諗嘅話，煮得嚟都上車。」於是佢已決定會早一、兩日叫議員睇定餐牌同揀咗先，等餐廳可預先準備。
Cyd又話唔知係咪因為佢哋人多勢眾，環境局連同局長黃錦星、副局長陸恭蕙、政治助理區詠芷等足足派咗十六人，直情係人盯人咁嘅格局。三十幾人外訪，所費不菲，希望大家都滿載而歸，唔好浪費公帑啦。