政情：黃進達婚照拒露兩點
康泰旅行社董事總經理黃進達（Jason）舊年被細佬爬頭做「老襯」，今年九月終於到佢同拍拖八年嘅女友拉埋天窗。Jason自從被父親黃士心大爆婚訊後，好多人都關心婚事籌備成點，佢本身做旅遊，去邊度影相同度蜜月都好有參考價值喎。
未婚妻想要浪漫韓國style
尋日Jason就自爆話，下月會一口氣飛去外地影兩輯婚紗相，首站去首爾，係未來老婆揀嘅，老婆仔話明要有浪漫韓國style，即係影出嚟嘅效果好似公主王子嗰啲。講到唔少人會着番套好似《大長今》嗰啲傳統韓服影婚照，仲有韓國型男必備「大眼裝」畫眼線，Jason即刻耍手兼擰頭話「咪搞」，今次只會正正經經着禮服影，仲叫記者唔好同佢老婆講有畫眼線呢回事，費事攞嚟搞！
第二站就係輪到Jason揀嘅布吉，面對住陽光與海灘，就咁着起套禮服影相，真係有啲格格不入。Jason話布吉一站，未諗到用乜嘢造型，記者就提議佢一係着泳褲，學猛男show咁打埋煲呔，一係着夏威夷恤、踢拖，點知佢話謝絕「露兩點」，Jason果然守身如肉。