政情：廖長江撈埋馬會大董
早兩日馬會大董李國棟醫生突然辭職，話咁快已有人選填補佢留低嘅空缺，新進馬會大董係身兼全國人大嘅立法會議員廖長江，任期由四月一日起生效。做咗廿幾年馬主嘅廖長江話，大約一個禮拜前馬會有人詢問佢嘅意向，佢衡量過之後應承咗，上任首要任務係先了解吓情況，再睇睇有咩大計幫手宣傳馬會。
身兼多個公職
本身係大律師嘅廖長江公職唔少，佢現任學術及職業資歷評審局主席、打擊洗錢及恐怖分子資金籌集（金融機構）覆核審裁處主席及港大校務委員會委員等。去年首次代表中華總商會出戰立法會選舉，成功當選。話時話，立法會郁親就玩拉布，賽馬日一個星期有兩日，星期三立法會開會仲撞正夜馬，廖長江怕唔怕成日被困住喺立法會，無暇分身？廖長江話，佢的確考慮過，不過認為應該冇問題嘅。
馬會大董係由一百八十八位遴選會員當中挑選，今次廖長江躋身董事局，馬會仲要搵個人做遴選會員，先至砌掂今次由李國棟引起嘅人事變動，唔知邊位熱愛賽馬嘅城中名人雀屏中選呢？