政情：新民黨瞄準功能組別
去年立法會選舉成功搶到兩席嘅新民黨，一直密謀壯大議會勢力。佢哋眼見自己專攻中產票源都算成功，吸納到唔少專業人士支持，所以有意更進一步，開拓另外一個中產戰場，就係進軍三個功能組別，分別係會計界、資訊科技界同教育界，目前又以會計界最有機會叫胡。
呢三大功能組別嘅共通點，都係選民基數較多，而且都係泛民地盤，照計對於建制派嚟講，都無乜肉食。但偏偏新民黨視為機會，覺得新民黨嘅專業形象有助吸票，目前已鎖定呢三大組別，積極搵人備戰。聽聞西環方面初步首肯新民黨進佔功能組別，認為由新民黨搶佔呢三個功能組別，勝算較其他建制派政黨高。
會計界方面，最有機會幫新民黨披甲上陣嘅係趙麗娟，佢係會計師公會四十年來首位女會長，江湖地位不容忽視。佢加入咗新民黨有一段時間，仲係新民黨中委，由佢出戰好合理，絕非陪跑分子。
教育IT界席位亦欲取
而教育界方面，新民黨亦諗住搵人小試牛刀，目標人物係新民黨顧問、教育評議會副主席何漢權，最近更有人游說何漢權入黨，但遭何漢權婉拒，講明就算再次出選，都只肯以獨立身份，但新民黨高層見距離下屆選舉仲有大把時間，所以打算繼續動之以情游說佢入黨，未諗住另覓人選。
另外一個資訊科技界別，原來新民黨已經頻頻招攬賢能，每逢IT界有咩社交場合，新民黨例必派人去蒲頭。有業界人士話，葉劉淑儀去年有意參選特首時，都有唔少資訊科技界選委有意提名佢，足證新民黨喺IT界有一定支持者，但最頭痛係目前無乜人想參選，因為大部分人都覺得泛民莫乃光實力太強勁，暫時未有人敢做「第二個譚偉豪」，挑戰票王莫乃光。
政改諮詢如箭在弦，立法會功能組別會唔會變，會點變都唔知，新民黨唔理咁多，一於物色到人選至講其他，以免蹉跎歲月，較有實力嘅人選都已經泊咗其他碼頭，咁就講乜都無用嘞。