中環出更：陳晴三代愛玩角色扮演
古云「勤有功，戲無益」係咪已經過時就見仁見智，不過卓妮眼見時下年輕一輩，人人「機不離手」亦唔見得健康。「牛下女車神」 李慧詩（Sarah）尋日獲聯合國兒童基金會（UNICEF）委任為香港委員會大使，尋日出席兒童遊戲權利活動時，自言最明白「遊戲」真諦。UNICEF香港委員會主席陳晴（Judy）亦感慨今時唔同往日，佢寧可將童年玩意傳授畀囝囝，謝絕智能手機入侵！
Judy透露細個時最鍾意同父母玩角色扮演遊戲，父親前港澳辦主任陳佐洱更會扮演囝囝，反問Judy「點樣做好人」啟發思考，相當有教育意義。依家囝囝亦喺佢嘅薰陶下愛上角色扮演，易角教Judy執玩具添！童年喺北京度過嘅Judy又透露，細個好鍾意一家人去郊外踩單車，而佢至為鍾情香山公園，至今仍然難以忘懷每逢秋天來臨嘅紅葉景色，童年回憶比時下年輕人匿喺屋企打機多一份詩意。
李慧詩享受兒時玩意
UNICEF提倡「遊戲」應包含四大精粹，包括孩子主導、快樂成長、隨時隨地及自由空間，自稱「細個一有時間就玩」嘅Sarah絕對明白遊戲嘅真正意義，皆因屋邨長大嘅佢自細就同一班鄰居四圍玩水槍、掟手巾同大風吹遊戲，由於物質享受唔多，Sarah更同鄰居自創「大白鯊」遊戲，其實係「捉依因」變奏版，童年生活果然多姿多采。
身兼UNICEF香港委員會副主席嘅前廣告界女強人紀文鳳（Leonie），就遺憾細個因為父母管教嚴，惟有專注讀書，八兄弟姐妹都冇咩機會落街玩，但亦造就佢呢副自言「死做爛做」都唔見攰嘅堅強個性，喺商界闖出一番成功事業。
卓妮