食署外判工冇監管匿「蛇竇」瞓覺

「次次都見架手推垃圾車擺咗喺路邊，但好耐都冇人，好奇望下先知個清潔工匿埋瞓覺，完全無王管！」粉嶺靈山村居民李先生早前發現，村口廟宇旁突然出現一個以木板、紙皮及帆布搭成的帳篷，細看下竟見有清潔工在內呼呼大睡，懷疑有人自闢「私竇」蛇王，「嗰度好僻靜，匿喺入面幾耐都冇人知！」李不滿部門監管不力，令蛇王事件長揭長有。

記者曾多次實地查證，發現有關清潔工每日工作至早上十一時左右便會返回「私竇」休息，時而整理個人物品、時而靜坐養神，約一小時後即換上便服離開。

放大圖片	清潔工有時會換上便服在村內公眾休憩處，「蛇王」近兩小時才返回工作崗位。

接轉介始突擊巡查

食環署發言人證實，上址由潔淨服務承辦商提供街道潔淨服務，負責該地段的工作時間為上午七時至下午四時，期間午膳一小時。發言人續稱，接獲本報轉介後曾派員突擊巡查，並未發現被指是清潔工「私竇」的自建帳篷，但發現承辦商員工短暫擅離工作崗位，已隨即向承辦商發出口頭警告，稍後亦會發出失責通知書，其後覆查已未有再發現違規情況。

不過，李先生事後指有關清潔工依然經常擅離職守，「個『私竇』係就係唔見咗，但佢都係做一陣嘢就匿埋瞓覺，有次見佢冇着制服喺村入面瞓足兩個鐘！」

立法會議員王國興認為，食環署外判工經常被揭發「蛇王」事件源於監管不力，「將啲工作外判晒出去不特止，連監管責任都外判埋，收到投訴先巡吓，絕對唔可以接受！」王又指當局有責任就承辦商工作水平把關，更應在招標時檢視承辦商管理素質，「外判制度容易令前線員工受到剝削，呢個亦可能係外判工蛇王嘅誘因之一，政府應該考慮埋呢點，全面檢討吓！」

促政府檢討外判制

「清潔工普遍年紀比較大，又要靠體力勞動做嘢，日曬雨淋，除咗要懲罰，亦都應該考慮下畀時間同地方佢哋小休！」當區區議員黃宏滔認同食環署按指引巡查及懲罰「蛇王」員工的同時，亦應了解前線員工，包括外判工的工作環境及情況，提供合理小休時間，在服務水平及員工福利中取得平衡。