政情：今日你上鏡：懲署靚女槍手

「巾幗不讓鬚眉」呢句話聽就聽得多，但見到眼大樣靚嘅二級懲教助理李詠儀，與一班身形魁梧、鬚根密布嘅男子漢們，一齊着住軍裝揸槍演練嘅英姿，先知呢句話真正嘅畫面。最新一期懲教署月刊《愛群》介紹前稱先鋒隊嘅懲教緊急應變隊，並登出一張李詠儀與隊友訓練時嘅照片（圖），相中靚女眼神凌厲堅定，幾有震懾威力。

李詠儀係游泳及三項鐵人運動健將，佢話唔怕艱辛投考緊急應變隊，係因為工作更具挑戰性，仲因為身形高大，獲編配向來係男性天下嘅槍手（Gunman）崗位添！緊急應變隊負責維持法院羈留室運作、押解在囚人士上庭或就醫等，一旦遇到騷動、逃獄或挾持人質嘅事件，各隊員便會搖身一變成為精銳部隊，負責平亂，挑戰性係好高o架！

第一手消息請下載on.cc東方互動iPhone/iPad/Android/Windows Phone Apps