特首梁振英（CY）喺競選特首時提出設立「體育運動專員」（體育專員），用意係檢討並完善現行體育管理架構，推動體育運動全面發展。但佢喺施政報告中就未有提及體育專員一事，令外間猜測呢個建議已經石沉大海。不過，據聞新政府對於設立體育專員仍然未死心，因為有官場中人正着手研究體育專員職級同具體職能。
有知情人士話，有官場中人最近四出同業界代表，商討體育專員一職嘅具體工作。事關目前政府推動體育發展係趨向精英化、普及化同盛事化。究竟體育專員呢個職位點樣令體育發展再上一層樓，都係政府同業界探討嘅內容，相信具體人選方面要遲一步先會研究。
有政界中人估計，體育界對於新政府係咪設立體育專員一職咁關注，好大程度係因為體育界爭取多年，仍未見政府喺推動體育發展方面有重大突破，所以或多或少將期望放在體育專員身上。至於呢個職位究竟可以發揮幾大作用，呢個都冇人敢預測，或者一切只係心存盼望。
不過，說到底大家都好想知道邊個做體育專員，分分鐘可能物色一啲有幹勁理想嘅前精英運動員擔任都未定，其實呢類人好多，好似羽毛球手陳念慈、「亞洲車神」黃金寶、「風之后」李麗珊都係好人選。