海洋公園計劃重建水上樂園，整個工程開支要成二十三億元，海洋公園主席盛智文又要向政府「度水」求救。商務及經濟發展局局長蘇錦樑（Greg蘇）尋日就喺立法會一個委員會上，同班議員商討海洋公園借錢嘅問題。Greg蘇話，政府向海洋公園提供借貸，將會收取同投資外匯基金回報相若嘅浮息利率，即約為年息百分之五。不過，工聯會鄧家彪就話，海洋公園連舊債都未還清，質疑佢哋將來係咪能夠如期還錢。點知Greg蘇就好似做擔保人咁，話海洋公園應該可以還到錢喎，如果還唔到係咪佢墊底先？
