今年立法會議員就財政預算案向政府提出嘅問題共有五千五百條，破晒過往嘅紀錄，如果要將政府整套書面答覆印晒出來，所需嘅紙張真係多到不堪設想。我哋尋日發現，理應支持電子化嘅資訊科技界議員莫乃光（Charles）就好嘥紙，竟然要求秘書處提供晒所有政府答覆嘅中英文影印版本。不過，Charles就否認唔環保，賴可能係同事搞錯咗喎。
議員就預算案提出嘅問題一年比一年多，秘書處尋日話，如果議員要求提供整套政府答覆嘅中英文影印本就會涉及大量資源，特別係紙張，所以請議員重新考慮係咪索取影印本。
其實淨係要晒全部答覆嘅中文印本都已經唔環保，但Charles竟然連英文版都要埋。Charles解釋話，可能係同事搞錯咗喎，會同秘書處講淨係印自己有需要嗰啲答覆。其實身為IT界代表，Charles應該全面推動電子化至啱。
人民力量陳志全（慢必）同地產及建造界石禮謙亦都要求攞晒中英文版影印本。石禮謙解釋，因為自己對眼唔好，唔鍾意睇電腦，係咪唔環保就見仁見智咁話。慢必就承認自己擺烏龍，話會同秘書處溝通，否則印晒出來就擺都冇地方擺喎。