政情：李國棟辭馬會大董
香港賽馬會董事局董事（大董）一向係權力地位嘅象徵，所以唔少人都爭住做，但尋日就有人突然辭任。賽馬會尋日發新聞稿，宣布加入董事局九年嘅李國棟醫生決定退任董事一職，原因係佢喺本港及海外嘅專業事務同公職日漸繁重。至於佢個大董空缺，有消息話可能會由遴選會員、立法會議員廖長江或中策集團主席柯清輝接棒。
04年入局 補堂叔空缺
馬會話，李國棟自去年底開始，先後就任香港醫學專科學院主席、智經研究中心主席、世界家庭醫生組織（WONCA）亞太區主席，以及擔任多個政府及公共衞生組織嘅成員。佢喺○四年擔任馬會大董之後，曾加入該會多個常務及專責委員會工作，○八年仲做埋投注委員會主席，公職多到數手指都數唔晒，難怪李醫生吃不消，要退任抖氣喇！
現年五十八歲嘅李國棟，係香港四大家族之一李佩材嘅第四代後人，可以話係馬會嘅忠實擁躉，早喺一九七八年已經成為馬會會員，九五年獲選為遴選會員，○四年二月獲馬會邀請加入董事局，填補當年忽然離世嘅李福深之董事空缺，而李福深就係佢嘅堂叔。