早前北京被「毒霧」侵襲，周街都見到戴住口罩嘅民眾。而上京開會嘅港區人大代表同政協委員，雖然只係停留京城短短半個月，當中已有唔少人都「中招」，身體出現各種病痛。其中最常見嘅係呼吸道感染，因而搞到把聲沙沙哋，有人甚至咳嗽不停，即時要睇醫生。而港區人大代表劉健儀（Miriam）仲慘，被毒霧搞到皮膚敏感「染紅」，估計至少要兩至三個星期先至可以好番。
最近喺北京返港嘅Miriam話，今次上京前已做足準備，帶定晒潤膚霜，諗住有晒準備就萬無一失啦，點知到「兩會」尾聲就出現皮膚敏感，出現紅點粒粒，估計要兩、三個星期先至可以好番，認真係無妄之災，佢仲補充話，難怪「兩會」就環境保護部表決時，該部門獲得咁多反對票喇！Miriam話，下次要考慮帶啲勁啲嘅潤膚霜先頂得住。不過，如果係毒霧而導致皮膚敏感嘅話，再勁嘅潤膚霜就唔知頂唔頂得順喇。