政情：泛民拉布高官「罰坐」
立法會將於四月廿四日恢復二讀財政預算案撥款條例草案，「長毛」梁國雄表明會「拉布」要求政府全民派錢一萬元及推出全民退休保障，加上其他泛民黨派嘅零星修訂，總共有數百條修訂。「拉布」戰幔即將掀起，行政、立法博弈再次展開，雖然政府已獲批七百多億元臨時撥款，但事實上唔用得好耐，只要「拉布」戰事稍長，政府分分鐘會因冇錢而癱瘓，故有關方面要做好「剪布」準備。
長毛鈺成將鬥法
立法會早前通過向政府批出嘅七百五十五億元臨時撥款，只相當於預算案全年開支嘅兩成，預計只可以用到不足兩個半月，即係去到五月底就用完，加上政府每年只可以申請一次臨時撥款，換言之，如果「拉布」戰事超過四星期，政府分分鐘會因為冇錢而癱瘓，公務員、綜援戶隨時因而冇糧出。據聞政府內部評估形勢後，預料「拉布」可以喺兩至三個星期內結束，但如果未能結束，就要狠狠「剪布」。
要防止政府癱瘓，立法會主席曾鈺成扮演重要角色，除咗可以出絕招「剪布」外，亦可以決定相關修訂係咪可以提出，以及點樣提出。過往有議員製造大量修訂，但其實主席大可以修訂針對同一撥款為由，決定進行合併辯論及表決，大大縮短辯論時間。不過，「你有張良計、我有過牆梯」，長毛今次就再預告會變陣提出「逐個局長逐個減人工」之類嘅修訂，究竟最後係咪可以合併辯論，咁就要睇主席嘅智慧喇！
由於預算案涉及政府所有部門開支，今次「拉布戰」嘅受害名單除咗財政司司長曾俊華（鬍鬚曾）外，各決策局長亦人人有份。據聞，政府初步打算編更安排「陪坐」以示團結，雖然有局長心繫問責團隊，但自問難以日以繼夜死撐，所以或會只派個副局長「陪坐」。
至於本身冇副司長嘅鬍鬚曾如何應付「拉布戰」，會否搵轄下政策局嘅副局長去「陪坐」，定係用帝國驕雄古羅馬鬥士嘅精神奮勇作戰，坐足全程？大家就要拭目以待喇！