中環出更：黃永龍幫手打理家族生意
信和置業主席黃志祥一門多傑，大仔黃永光文質彬彬、謙虛有禮外，次子黃永龍（David）都書卷氣十足。年僅廿五歲嘅David喺美國著名學府哥倫比亞大學歷史系畢業返港半年，佢日前現身北京海外聯誼會青委會春茗時話，家姐近日生咗BB，希望多啲時間坐月湊B，佢於是幫手分擔管理租務生意。
哥倫比亞大學歷史系畢業
唔少富二代讀大學，鍾意揀會計、法律、經濟或工商管理，事關接掌家族生意方便得多，但David就揀歷史科。何解？佢謙稱讀書唔叻，所以唔似大哥咁，揀讀經濟學。佢仲透露家族一個秘密，原來爸爸對選校要求高，如果係仔嘅話，全部安排入讀哥倫比亞大學，係女嘅話，就入讀耶魯大學，呢個傳統，一直跟到足喎。
講番北京海外聯誼會青委會春茗，啱啱升呢做全國政協委員嘅廠商會會長施榮懷就帶病赴宴，原來佢上京開兩會期間入住嘅貴賓樓因為無窗，唔知外面冷定熱，每次外出總係着少咗衫，搞到傷風兼鼻塞。
卓妮