中環出更：政商名人齊歎正宗杭州菜
政商界名人會員匯聚嘅跑馬地馬會滿貫廳，近日獲法國飲食權威米芝蓮評為推介級別，適逢中菜廳早前推介「限定」供應十一日嘅杭州菜，身為馬會大董嘅葉澍堃（Stephen）都唔執輸，日前約埋一班老友去大快朵頤。當晚「快勞夾大王」杜振源夫婦、佳能香港副總裁鄧慶治、「演唱會之父」張耀榮千金張麗芳與夫婿鄧偉業、著名耳鼻喉專科醫生黃漢威等都有出席。
「雪菜毛豆蒸黃魚」 個個讚好
傳統杭州菜講究原汁原味、鋪陳精緻同細膩，所以中菜廳今次專程邀請內地大廚曾從軍來港主理菜式，大部分材料同醬汁均由杭州引入，確保將菜式原汁原味呈獻。精通杭州菜嘅曾大廚，巧手炮製出多款佳餚，其中一道「雪菜毛豆蒸黃魚」，肉汁豐富，鮮味無比，大家食過都豎起拇指。曾大廚透露，秘訣係要先用鹽將鮮魚醃個半鐘再落鑊蒸，令魚嘅鮮味更為突出。
中菜廳總廚林勸飛亦親自操刀，炮製名菜「叫化童子雞」，特別用上脂肪少、肉質滑嘅清遠走地雞。仲有以杭州大頭魚打成嘅魚丸用嚟放湯，特別彈牙清香，以及煨得甘而不膩嘅「東坡肘子」，每道菜都色香味俱全，實而不華。
加上前仁濟醫院主席吳守基當晚特別帶來一批靚酒供大家品嘗，確係佳餚配美酒，難怪個個都話值得再試喇。復活節將至，Stephen話會同成班老友飛印度旅行，到時又會四出尋找隱世美食，認真識歎。
卓妮