政情:黃靜文入「廠」做CEO

政制及內地事務局前副局長黃靜文(Adeline)去年卸任後九個月,終於決定出山,但唔係重返官場,而係去廠商會接替梁世華,出任廠商會行政總裁一職。聞說Adeline早前同人講,因為唔做官,丟晒家中所有斯文返工衫同手袋,唔知依家係咪又要重新入貨呢?

Adeline加入廠商會嘅傳聞,已流傳咗好幾個月,我哋尋日打聽到Adeline呢一兩日會動筆同廠商會簽約,即時向廠商會會長施榮懷求證。施榮懷話原來廠商會同Adeline已經傾咗好耐,大家都經過幾個月時間互相了解後,最終先達成合作共識。

會長講起都開心

能夠搵到前副局長替廠商會効力,施榮懷講起都開心,佢話自己好重視行政總裁呢個位,因為每名會長都係三年任期,但行政總裁就係長期作戰,而且要應付大量工作,小至廠商會中學,大至內地搞工展會都要幫手,加上明年係廠商會八十周年,一定係好大挑戰。咁今次廠商會有無重金禮聘呢?施榮懷唔肯透露,只係話以Adeline嘅資歷同經驗,廠商會嘅出手係非常合理喎。

第一手消息請下載on.cc東方互動iPhone/iPad/Android/Windows Phone Apps