中環出更：蒙德揚童夢做消防
每個人一生中喺唔同階段，總有唔同嘅夢想。信興集團副主席蒙德揚（David）尋日出席集團贊助嘅公益活動啟動禮時，自爆細個時嘅夢想係做消防員，事關佢覺得消防員登上雲梯，被送到幾十層樓高處，然後揸住水喉勁射救火時，十分威風，好過癮。佢笑稱，長大後至知原來消防員嘅體能要求好高，所以咪知難而退囉！
David雖然夢想破滅，不過都冇唔開心，因為人生流流長，可以唔止得一個夢想嘛！David話，早幾年佢希望挑戰四十二公里嘅全馬拉松賽事，後來全力以赴，最終願望成真。適逢集團成立六十周年，佢特登以「撻着六十個夢想」作為頭炮活動，希望鼓勵六十組中學生透過日常觀察，a為長者及殘疾人士送上關愛和溫暖，實現佢哋嘅夢想。
姊投資心得：債券穩陣
同場仲有David家姐兼信興電器貿易董事蒙倩兒，佢負責集團嘅投資重任，平時好少公開蒲頭。講起投資心得，佢話以債券為主，強調最緊要係穩陣喎！