中環出更：車隊出戰耐力賽 葉恭正技癢
仁濟醫院總理葉恭正（Paul）夫婦及候任主席梁昌明有一日喺尖沙咀一間酒店餐廳飲茶傾偈，畀卓妮撞到，原來阿Paul旗下KCMG賽車公司獲邀六月下旬去法國，參加被視為賽車界三大盛事之一嘅世界耐力錦標賽，賽事已有九十年歷史，今次係首次有中國車隊獲邀出戰，難怪曾經係賽車手嘅Paul好雀躍，話會趁機將部分贊助所得捐畀仁濟。
Paul嘅太太林麗珍（Annika）都係賽車發燒友，當年就係喺澳門賽場上被老公英姿吸引，造就咗呢段姻緣。Annika好興奮話，到時一定要帶埋一對寶貝女兒齊去開眼界。擁有多架跑車嘅梁昌明自爆，佢經常到珠海及肇慶鍊車，今次Paul咁勁獲邀請出賽，到時要同仁濟兄弟姐妹組團去法國觀賽兼打氣至得。
獲入場券好光榮
喺巴黎西南小城利曼舉行嘅廿四小時耐力賽，特色係由三名車手輪流上陣，廿四小時不停馳騁，所以好考戰車性能及車手耐力。Paul話，全球只得五十六架車參賽，而且冇得報名，要由主辦機構發信邀請，所以攞到入場券已經好光榮。雖然Paul心癢癢，但係都唔敢輕言落場玩，事關少啲體力都唔掂，到時佢哋將派出三位中、英及瑞士嘅車手出戰。
咪以為咁勁嘅賽事，獎金一定好和味，其實冠軍獎金只不過係象徵式嘅四千歐元，即係大約四萬港元，所以話出賽者真係為夢想而戰。Paul預計參賽將耗資一千五百萬元，包括以五百萬元購入一部戰車，加上引擎損耗、耗油及車隊人員食宿開支等，幸好賽事備受全球發燒友關注，商機處處，淨係車身可賣嘅廣告就高達二千萬港元，仲有餘力做吓慈善嘅。
卓妮