立法會建制派議員星期六、日一連兩日去視察前海、南沙同深圳，有人預早提佢哋務必要出席，原來剛升任全國人大法律委員會主任嘅喬曉陽要見佢哋。喬老爺原基本法委員會主任個位，已經由副主任李飛頂上，今次會見，意味喬曉陽喺呢個新崗位，以後仲會繼續關注香港事務，相信仲會代表新一屆政府，向香港人放話。
建制派今次兩日一夜嘅行程，不單止係考察前海、參觀南沙，原來喬曉陽星期日早上喺深圳麒麟山莊有場座談會，成個座談會由早上九點半至十二點，長兩個半鐘頭，預計都唔單止蜻蜒點水咁講吓官樣文章咁簡單。過去全國人大常委會嘅多次釋法，喬老爺都有參與，對香港非常熟悉，過往多次難題都係佢出手搞掂，今次由佢代表放話，實在適合不過，怪不得建制派都踴躍參加。
今次行程其實處理香港事務嘅官員雲集，星期六晚議員入住南沙酒店，晚飯由中聯辦主任張曉明請客，翌日喺麒麟山莊，則輪到港澳辦主任王光亞請客，喬曉陽、張曉明都會出席。