政情：有相為證：世紀合照

香港各界婦女聯合協進會尋日舉行成立二十周年啟動禮暨慶祝三八婦女節，特首梁振英夫人梁唐青儀以婦協名譽贊助人身份出席，並負責向服務咗廿年嘅創會名譽會長致送紀念品，其中一個就係新任政協常委唐英年嘅媽媽唐尤淑圻，意外促成咗「世紀合照」。啱啱喺一年前，梁唐青儀個老公同唐尤淑圻個仔爭緊做特首，今次兩人笑騎騎合照，世事真奇妙。