做咗九年醫院管理局主席嘅胡定旭今年底任期屆滿，早前傳聞話會由香港公開大學校長梁智仁接棒。尋日梁智仁出席大學活動時就耍手擰頭，話呢個講法完全係揣測，仲話醫管局主席唔係話想做就做得，係特首嘅個人決定，而特首亦冇聯絡過佢。咁佢又有冇興趣做主席呢？梁智仁就笑笑口話，自己九○年做緊港大醫學院院長時，都做過一年醫管局委員，話如果政府要佢幫忙，就一定會幫喎。不過，梁智仁本月初已出任西九文化區管理局諮詢會主席，如果再做埋醫管局主席，就算有能力，時間上係咪分配到呢？
