政情：公民講場：橄欖快過辣招 放舖勁賺8300萬

立法會議員陳鑑林（橄欖）趕及政府上月推出「加碼雙辣招」前，放售大圍舖位套現八千五百萬元，以廿八年前一百五十五萬元購入價計算，勁賺五十四倍，但就惹來「偷步放舖」之嫌。橄欖尋日喺立法會否認收風放舖，強調只係買家三番四次主動搵上門先至促成交易，唔關佢事喎！單從呢單交易嚟睇，投資有道嘅橄欖果然名不虛傳，多年來一直用來收租嘅陳年舊舖二話不說話放就放，政府苦心研製嘅「辣招」未開跑已經輸喺起跑線上，仲眼白白少收三百六十萬元額外印花稅。其實橄欖依家分分鐘已經做咗億萬富翁，加上佢話會用筆錢投資股票，既然眼光咁準，不如專注投資好過啦，何苦為八萬元人工做議員咁辛苦呢？