政情：Greg蘇闢謠借新丁過橋
我哋尋日報道過，話有傳商務及經濟發展局局長蘇錦樑（Greg蘇）之所以遲遲都未搵到副局長，係因為佢驚個副局長叻過佢，因而被人取而代之。咁啱Greg蘇個政治助理陳百里尋日首日返工，Greg蘇就趁機帶陳百里落立法會闢謠，證明自己唔係忌才，又唔肯評論自己係咪眼角高，但講來講去都唔肯交代揀唔啱副局長嘅原因。
陳百里政助首日開工
Greg蘇喺介紹陳百里時話，佢一向用人唯才，佢亦積極搵副局長，皆因佢個政策局要兼顧嘅範圍較多，加上佢周不時要外訪，冇個副局長喺立法會幫手代答問題真係冇咁方便。不過，佢話鋒一轉話，搵副局長呢件事始終急唔嚟，又自誇話其政策局素來關係融洽、工作環境良好，希望新同事可以盡快適應環境喎。
新上任嘅陳百里就話，第一日返工未有時間向其他同事了解新崗位運作。被問到返新工有冇壓力，陳百里就話任何工作都有壓力，佢會盡快做到最好喎。對於因為做政助而辭去觀塘坪石區議員議席，陳百里話補選係必要程序，如果對街坊引起不便，佢只能夠講句唔好意思，但就承諾會喺依家嘅崗位做得好啲，繼續服務市民。