政情：劉江華新一代錄音機
兩會期間中央多次就政改表態，話「愛國愛港」係下屆特首嘅必要條件。尋日立法會討論下屆特首選舉候選人提名條件，劉慧卿就問愛國愛港會唔會被列為候選人提名條件之一，點知首次披甲上陣嘅署理政制及內地事務局局長劉江華就全程錄音機上身，既唔肯正面回應問題，又不停將官方答案讀完又讀，成為新一代官場人肉錄音機。
林大輝籲「講出心底話」
不過，就算工黨何秀蘭問特首選舉會唔會有篩選成分，定係何俊仁問政府遲遲冇意見係咪等候中央發落，劉江華始終貫徹平淡如水嘅聲線，重申當局會按《基本法》及人大常委會嘅決定，以制訂二○一七年特首選舉安排。近期敢言程度爆燈嘅工業界林大輝就對劉江華嘅表現好失望，話劉江華應該理直氣壯地講出心底話。不過，劉江華仍然繼續播帶，話政府會聽市民意見，又自嘲話雖然自己係初哥，但佢知道已經答咗問題喇。
見到劉江華遭受攻擊，佢嘅黨友都幫吓手撳掣問問題，費事老友畀泛民主派攻擊到體無完膚。雖然劉江華講到含糊其辭，但基本法委員會副主任梁愛詩尋晚主動提到已故國家領導人鄧小平喺八十年代已經提出，治港嘅人一定要係愛國愛港嘅人，仲話認為愛國愛港嘅特首先可以管治好香港，睇嚟梁愛詩嘅講話理直氣壯得多。