近似懲教署英文縮寫嘅自訂車牌「CSD HK」，早前被公開拍賣引起懲教署員工不滿，發出公開信要求運輸署收回該車牌。
不過，署理財經事務及庫務局局長梁鳳儀尋日以書面回覆立法會議員話，「CSD HK」冇違反車牌審批準則，佢話CSD可代表唔同人士、組織或機構名稱嘅縮寫，HK亦都係傳統車輛登記號碼嘅字頭，唔一定代表港府，所以經考慮審核委員會提供嘅意見後，認為上述自訂車牌冇問題。
懲教事務職員協會初級組主席趙志強直言對梁鳳儀嘅回覆好遺憾，仲話佢做咗幾十年公務員，對好多部門都有深厚感情，唔排除日後自訂其他政府部門名稱做車牌喎！其實除咗趙志強，我哋都聽聞有人打算向政府「挑機」，自訂更多敏感車牌測試審批底線，到時被測試嘅政府部門就有排煩喇！
至於投得「CSD HK」車牌、幫懲教署解決燃眉之急嘅仁濟醫院主席鄭承隆話，會再同懲教署商量吓，如果對方無意使用該車牌，佢會再諗吓點樣處置喎。