政情：「無殼」區議員安置橋底？

天水圍陳思靜提出

元朗區議會尋日舉行城鄉規劃及發展委員會會議，其中天水圍天盛選區區議員陳思靜就提出開闢行人天橋底作區議員臨時辦事處，皆因佢過去一年多都係「朝行晚拆」，只靠擺流動街站會見居民。佢話去年政府提供畀區議員開設辦事處嘅津貼費用，都要全數交還，直至今年因資源愈來愈多，先退而求其次，由天水圍跨區到元朗開辦事處，一星期返天水圍五日見街坊。

據了解，與會議員一面倒支持方案，政府多個部門亦疑似開綠燈，規劃署話可以考慮，而地政處指待有關政策局支持就會做，但水、電及通訊事宜就要陳思靜自己搞掂；而民政事務處就話可以協調。陳思靜回應查詢話，首選當然係喺自己選區內設辦事處啦，但搵唔到舖位嘅話，「瞓天橋底好過瞓街」，所以就提出天橋底設辦事處係咪可行。

除咗陳思靜外，東區杏花邨區議員何毅淦都因為地契問題，要去到選區外嘅商業大廈設辦事處，每星期都要返回原區「開壇」。不過，佢就冇陳思靜咁好彩喇，事關佢曾多次建議政府撥出使用率極低、而且唔阻街嘅行人路段作設臨時辦事處，但只得政府回覆「可以研究」，但佢話會繼續爭取。

其實立法會議員陳婉嫻早前都聯同建築學者及文化界人士組成「天橋底行動」，建議政府修例，可於天橋底下建臨時房屋，以紓緩劏房、籠屋等問題，發展局當時都話收到建議並會作深入研究，但要考慮空氣質素。至於今次政府部門所講嘅「協調」同「考慮」，唔知係咪受嫻姐影響，開放咗態度呢？