中環出更：莊偉茵：電有分靚同唔靚！
由航空界跳到中華電力出任企業總裁嘅莊偉茵（Quince），唔經唔覺已入職半年，但佢一上任已經忙為中電加價四出奔波，仲坦言全無蜜月期，幸而佢將勤補拙，依家已經對電力略有認識。Quince話，依家先至知道，原來電都有靚唔靚之分。
大家冇睇錯，係「靚電」唔係「靜電」，Quince解釋，即係利用儀器同技術，將電力嘅質素提升，發揮出最佳嘅電能效應。好似大家日常乘搭嘅扶手電梯，有時會窒吓窒吓，行得唔夠暢順，就係因為啲電唔夠靚，咁就要加裝一啲裝置以提升品質喇。
去大亞灣唔怕輻射
為咗進一步了解電力，Quince日前仲跟同事深入大亞灣核電廠參觀發電過程。問佢怕唔怕有輻射？佢就話，核電廠嘅核芯堆外層有三層加固保護，確保操作安全，佢睇見都好放心。Quince話，初初都驚加入中電會悶，但佢笑稱，自己擅於在沉悶中發掘樂趣，依家同工程師齊齊開會「腦震盪」，擦出不少新火花。