中環出更：孝悌忠信化社會戾氣
最近接二連三嘅弒親案件令香港戾氣密布，令人慨嘆社會變得冷酷，道德倫理沉淪。圓玄學院前晚舉行慈善晚會，同屬道教嘅嗇色園黃大仙祠監院李耀輝都有到場，佢講起接連嘅兇殺案時感慨話，香港地小人多，容易積聚戾氣，加上社會充斥功利主義，傳統六親觀念淡薄，令年輕人唔知天高地厚。佢認為，化解戾氣嘅藥方係喺學校全面加強國學教育，灌輸孝悌忠信等道德觀念，培育下一代珍惜生命嘅慈悲心。
黃大仙祠善信眾多，咁有冇打算透過祠廟做啲嘢呢？李耀輝就話未有計劃，但咁啱最近佢應某大學邀請，到學校開辦中國文化及道德課程，為期十四星期，希望藉此傳遞正面思想畀時下年輕人，引人為善。
「關懷耆腦」 名人齊撐
當晚出席「同心關懷耆腦之夜」慈善晚會嘅城中名人，包括安老事務委員會主席陳章明、道教聯合會主席梁德華及「工廈大王」楊耀松兒子楊國佳等，圓玄學院主席陳國超及副主席湯修齊，成晚忙出忙入招呼賓客。前全國人大常委曾憲梓新抱黎瑞恩都有買枱捧場。
今次籌款目的係為即將設立嘅「智到家」服務籌集資金，為患有腦退化症長者及照顧者提供護理服務及訓練。陳章明致詞時分享佢父親亦係初期患者嘅經歷，佢話初時家人唔知父親係患者，有一段時間父親日日追問同住嘅女兒（即係陳章明妺妹），點解欠佢六十萬元仲唔還？搞到父女經常嘈交，後來經醫生指點至知父親患咗腦退化症，醫生仲教路，當父親再「討債」時，一於開張一百萬元支票還錢，結果兩父女皆大歡喜，聽落呢個方法都幾有效喎。
卓妮