特首梁振英上任後，各個問責局再度增聘副局長同政治助理，經過差唔多一年，商務及經濟發展局局長蘇錦樑（Greg）都只係搵到陳百里做政治助理，副局長一職遲遲未見影。
據聞遴選委員會向阿Greg提供唔少合適人選，但全部畀佢彈番轉頭，官場傳聞阿Greg揀唔落手，原來驚副局長叻過佢，甚至日後被取而代之。
商務及經濟發展局近年有唔少大鑊嘢要處理，例如免費電視、旅遊監管，甚至近期最熱門嘅限制奶粉出入境，都關呢個局事，所以好有需要搵個副局長分擔工作。
但據聞唔少合資格做副局長嘅應徵者，阿Greg都睇唔上眼，叫遴選委員會再揀過畀佢，拖吓又拖吓，最終只肯揀個民建聯區議員陳百里做政治助理。
所以官場流傳阿Greg忌才，擔心副局長叻過自己，惟有搵個低兩級嘅人幫手，咁就唔怕佢奪權。
單傳聞講到似層層咁，阿Greg要為自己闢謠，惟有做好啲，畀啲表現大家睇，咁大家就無咁多嘢講啦。