政情：公民講場：吳得掂 邵善波 議員瞄準開刀

教育局局長吳克儉上任以來，無論係德育及國民教育科風波，定係十五年免費教育等問題都畀佢搞到一鑊泡，唯一深入民心嘅就係佢被改花名叫「吳得掂」。至於中央政策組首席顧問邵善波一樣咁惹火，唔少議員都話要剷走佢領導嘅中央政策組，實行將佢同「吳得掂」一齊開刀。其中議員陳家洛尋日就話，佢會就財政預算案提出修訂，分別係要求削減中策組一年嘅開支，實行剷除中策組，以及要扣減吳克儉一年人工同福利，當係小懲大戒咁話。另外，陳家洛就預算案提出約五百條質詢，但數量多唔代表質素高嘅，如果係瑣碎無聊，咁就冇意義兼嘥精神喇！