政情：借水還魂止眼瞓 張華峰喪飲驅「魔」
好多時長時間開會，一唔夠精神都好易瞌眼瞓，好似金融服務界議員張華峰參加上屆政協會議時就被人影到佢瞌眼瞓，於是佢嘅瞌眼瞓形象就深入民心。張華峰尋日同傳媒聚會時就澄清，其實佢唔係經常瞌眼瞓，仲自稱驅趕「睡魔」有妙法，就係不斷飲水，飲完一杯又一杯，但就引伸另一個問題：「啲人一個接一個發言，我又唔慣人哋講嘢時行開去洗手間，都幾麻煩！」
踢爆象哥嗒話梅
張華峰講完自己嗰筆，忽然大爆進出口界議員黃定光（象哥）開會時會食話梅同餅乾以防瞓着：「大象一食話梅就醒晒！」不過，象哥開咁多會，咁樣食法止眼瞓，相信好快可以同張華峰「體」齊。不如學吓工聯會議員黃國健，喺上屆立法會拉布時沖普洱茶提神，一來有效過飲水，二來又唔會因為食得多而增磅。
最近政改議題鬧得熱烘烘，張華峰話金融服務界多數贊成擴闊選民基礎，例如依家全港約有一千個證券負責人，如果佢哋都可以投票，咁議員就更有代表性，同政府講數時更有牙力。佢仲話，業界都普遍贊成如果要做嘅話，相信二○一六年立法會選舉都做到喎。