政情：獲頒「法國藍帶勳章」 澳門英皇娛樂酒店揚威
○六年開業嘅英皇集團旗下澳門英皇娛樂酒店，近日喺飲食方面再創高峰，包括英皇娛樂酒店行政總裁余永焯等六名管理人員，尋日喜獲法國藍帶美食協會頒授「法國藍帶勳章」，係全球認可嘅業界榮譽，據聞呢個勳章來頭認真唔細，因為負責頒授呢個勳章嘅法國藍帶美食協會，本身係國際知名權威美食機構，源於十六世紀法國國王路易十四，所以酒店能夠脫穎而出，認真唔簡單。
六員工奪殊榮
澳門英皇娛樂酒店尋日同法國藍帶美食協會合辦授勳典禮，法國駐港澳總領事館副總領事Mrs.Agnes Humruzian等嘉賓出席，其中副總領事仲向六名管理人員，包括余永焯、英皇娛樂酒店總經理鄧偉明、英皇宮殿娛樂場總經理黎明智、英皇娛樂酒店酒店經理郭文忠、飲食部總監譚國基同中餐行政總廚林國榮頒授「法國藍帶勳章」。
據聞酒店方面為咗隆重其事，下月初會喺酒店九樓中菜廳特別推出四款「藍帶」款式，包括九層塔龍蝦餅等，到時酒店內一定會掀起一股「藍帶」熱潮嘞。
獲頒法國藍帶勳章嘅英皇娛樂酒店管理人員與頒獎嘉賓合照，左起：大會主持人Adrian Gooljarry、譚國基、余永焯、法國三大美食協會駐亞太區主席古載禮、Mrs.Agnes Humruzian、林國榮、鄧偉明、法國藍帶美食協會駐亞太區副主席林和忠、黎明智、郭文忠。