政情：超級慳電 對抗加價 星爺做阿Q
如果慳同環保係做環境局局長嘅唯一條件，咁環境局局長黃錦星（KS）一定勝任有餘，事關佢嘅環保生活已經去到一個超現實嘅境界，例如平均每日只係使用一點五度電，慳得嚟仲附帶一股澎湃嘅阿Ｑ精神，真係唔係一般人可以做得到，就算要佢回到石器時代生活，睇怕都難唔到佢。
不過，超現實局長始終都要重返現實推銷政策，KS尋日出席一個青年領袖高峰論壇時話，上任後深深感受到社會對環保政策嘅矛盾，例如市民對污者自付、固體廢物徵費嘅睇法，冷不提防仲爆出一句：「相信大家對呢個垃圾議題都聽過好多次喇」。
「有壓力先有進步」
KS仲心口掛住個勇字，即席問現場同學對垃圾徵費嘅意見，可惜同學仔對徵費耍手擰頭，擔心徵費會加重市民生活壓力。正當大家諗住KS聽到一定好失望之際，點知KS原來阿Ｑ精神爆燈，仲笑咪咪咁話：「有壓力先有進步o架嘛！」瞬間就擊倒班同學仔。
KS仲呼籲同學慳電，聲言慳慳埋埋「對抗兩電加價都喺度啦！」可見佢嘅阿Ｑ精神絕對係無極限！KS話，其實有好多人都好慳，力證自己「超現實」環保，你我都做到，好似導演李安咁，無論喺公司定拍外景，都一定會避免用即棄餐具同樽裝水。
佢透露，其實有時自己啲環保習慣都係被女兒影響，原來佢囡囡好鍾意食日本菜，但有次就因為間日本餐廳用木筷子而拒絕幫襯，果然係青出於藍！
其實KS尋日講咩都會自動拉到去兩電利潤管制中期檢討，睇嚟呢個問題都搞到佢幾心煩，就連活動後有記者問佢點睇中華煤氣下月加價，點知佢不厭其煩再提醒大家，要認清目標，聚焦兩電中期檢討，令兩電能源組合可以做到環保同價格平衡喎。乜KS唔係話慳電就可以對抗兩電加價咩？仲聚焦兩電中期檢討嚟做乜呢？