港府本月初急推「限奶令」無非都係想解決「奶粉荒」，但惹來內地居民強烈反應，殊不知理應最了解「奶粉荒」成因嘅醫管局主席胡定旭（肥胡），近日「升呢」做咗全國政協常委後，開口埋口都官話連篇，左一句話推行太過倉卒，右一句中間溝通了解唔夠充分，疑似站喺港人對立面為內地居民講說話，難道做咗政協常委後就要講內地嘅官話？
肥胡尋日首次以政協常委身份，接受電台訪問大談中港問題，當問及對「限奶令」嘅睇法時，肥胡疑似忘記醫管局主席身份，首先承認內地好多朋友因奶粉問題對香港好有意見，雖然佢有向啲朋友解釋港府嘅立場，但另一方面佢又承認可能中間嘅溝通了解唔夠充分，甚至係行得太過倉卒，反問港府嘅溝通「內交」工作係咪可以做得好少少。肥胡之後仲補充話，其實唔只奶粉問題，仲有個人遊問題，直言港府要睇得長遠啲喎。
講開肥胡，不得不提原來佢曾經先後喺經濟、港澳特邀同醫藥衞生界呢三個不同界別參與政協工作，呢個喺政協中算係極為罕見，其中佢成功加入醫藥衞生界，最近更循呢個界別進身政協常委行列，外界更加係始料不及。