貪曾在任時，深明「有權不用，過期作廢」的道理，是以佢最鍾意做離岸特首，用公帑豪住總統套房，發其春秋大夢；之不過，佢下台後，依然保留貪威識食嘅遺風，去到邊濫權到邊，咁講喇，曾爵士嘅「權力慣性」已深植骨髓，融入血液，成為基因，呢世都好難有得改㗎喇！
之不過，貪曾暢遊江蘇省高淳老街，竟有廣東省港澳辦及接待辦官員陪呢位退休「舊電池」玩，前呼後擁仲去南京梅花園賞花添！本報「政情」版鬧得好，話佢係太監扮皇帝出巡，唔知醜字點寫，不過，最犯賤都係內地省市官員，放着正經事唔做，甘願陪個貪官遊山玩水，如此浪費公帑，同腐敗確實冇乜分別！
內地官員公款吃喝旅遊，「三公」消費驚人，係老百姓都知係官場腐敗嘅根源，如今呢幕陪貪曾「扮皇帝出巡」，正正是「百無一事可言教，十有九分不像官」，清朝嘉慶年間，有個叫周錫章嘅喺禮部做個小官，成日應酬繁忙，奔走無暇，把個閒散的官做到十分忙碌，時人形容呢種做官態度為「閒官忙做」，睇吓內地省市級官員，「傍」住貪曾吃喝玩樂，不正是「閒官忙做」的翻版嗎？
老朽懷疑，內地之官員係唔係冇讀過毛澤東《為人民服務》呢篇大作，呢篇文章係毛澤東追悼張思德嘅演詞，張思德參加過紅軍，經歷長征，負過傷，一九四四年因炭窰崩塌而犧牲，毛澤東這篇約八百字嘅文章，八處提到「為人民」，其名言「為人民而死，就是死得其所」；換言之，幹部最緊要係「為人民服務」；家陣啲幹部就加多個字，變成「為人民幣服務」，而好些「閒官忙做」嘅更淪落到陪「假洋鬼子」吃喝玩樂，實在太不該！
新領導要一新政風，老朽寄望新班子真能把肅貪進行到底，查辦啲唔肯為人民服務而只知媚悅過氣權貴嘅四陪官員！