尋日係國際消費日，係彰顯消費者權益嘅大日子，咁啱亦係消費者委員會每月十五號出版《選擇》月刊嘅日子，消委會應該趁機宣傳至係，但該會冇宣傳不特止，仲連《選擇》月刊都冇出版，要押後到下星期一出版，究竟所為何事呢？原來竟然係為咗啲免費報要宣傳該會嘅產品測試報告。
事緣消委會新總幹事黃鳳嫺上場後，考慮到不少免費報章星期六冇報紙出版嘅情況，近日決定以後凡十五號撞正星期五，該會都不會出版《選擇》月刊，會押後到之後嘅星期一才公布，而所有《選擇》月刊嘅訂戶都因此而延遲收貨。據了解，消委會職員亦對有關安排略有微言，特別尋日係國際消費日，部分同事認為應彈性處理。
消委會發言人解釋，因為早前收到有傳媒朋友反映，指不少報紙星期六不會出版，如果《選擇》月刊星期五出版及開記者會公布詳情，好多傳媒都唔會去採訪，所以該會先至有此決定喎。
發言人又承認，今期《選擇》月刊其實有文章談及國際消費日，可惜未趕及同日發放有關資料。如果為咗遷就免費報出版而錯過一年一度嘅國際消費日，喺權衡輕重下，又好難怪該會職員有微言嘅。