政情：唐唐珍藏開拍 神秘買家百萬買酒
新任全國政協常委唐英年早前割愛，將一批收藏已久嘅靚紅酒拍賣，佳士得尋日舉行名為「尋味之旅，唐英年窖藏珍釀」嘅勃艮第專場拍賣，吸引唔少紅酒愛好者去買心頭好。其中最受注目嘅紅酒係1995年羅曼尼‧康帝（Domaine de la Romanee-Conti），最終以全日最高成交價、估價上限嘅一百萬元成交，加上買家佣金共一百二十一萬元。至於第二高價嘅紅酒批次則為七十萬元，同最高成交價只相差三十萬元。
拍賣紅酒出價高到一百萬元，究竟呢位買家係何方神聖呢？聽聞呢位一千零十七號神秘買家來自亞洲，尋晚係透過網上出價競投，除咗買咗羅曼尼‧康帝1995年呢個批次外，呢位神秘買家仲購入來自同一酒莊至少十批貴價紅酒，睇嚟佢對呢個酒莊真係情有獨鍾。
最平750元起
不過，咪以為拍賣紅酒一定係貴價玩意，事關尋日最平嘅紅酒批次，起步價都只係七百五十元起，估價上限為一千四百元，最終有人以超過估價上限嘅二千六百元收歸己有。如果錯過咗尋日拍賣專場嘅朋友都唔使失望，因為呢個拍賣專場今日中午會繼續進行，會拍賣唐唐另外四個批次嘅紅酒，估價由最低嘅五萬元至最高嘅五十多萬元。