政情：辭任非執董 葉澍堃為出書「減磅」
前高官葉澍堃（Stephen）闊別政治圈之後不知幾逍遙，去吓旅行、聽吓音樂會，每日過住優游自在嘅生活，最近佢仲辭咗三間公司嘅非執行董事及各委員會成員嘅職務添。有關公司嘅新聞稿就話，Stephen同董事會並無意見分歧，純屬佢有意投入更多時間喺佢個人事務上，所以先至辭職。不過，港府依家成日話缺乏人才，Stephen又突然辭任非執董職務，莫非想等過冷河，再出山重返政府？
退休後更忙
原來Stephen只係疊埋心水享受人生，佢話辭任非凡中國控股、米蘭站控股及金保利新能源嘅非執行董事之後，仍要做五間公司嘅非執行董事，所以正確啲講只係減磅啫。佢坦言，退休之後呢幾年實在太忙，最近又想抽番啲時間準備出版第二本飲食旅遊書，日後亦希望專注幫助「小母牛」香港分會建立網絡平台以推廣計劃，從而增加社會對小母牛計劃嘅認識，希望籌多啲善款喎，難怪Stephen嘅退休生活咁充實喇！