政情：高官換車 各顯本色
港府高官座駕行車里數驚人，每隔一段時間就要換新車，新政府最近又開始為司局長同常秘級高官進行換車大行動，購入數十輛凌志（Lexus）GS450h行政級房車，取代用咗至少七年嘅福士（Volkswagen）頂級系列「輝騰」（Phaeton）豪華房車。當局嘅如意算盤，係希望換車後新車既可以維持高性能，又可做到低耗油環保目標，聽聞至今已有十多部新車「落地」，最特別係有原廠顏色供官員自行選擇。
做老闆車無咁舒服
環保係新政府重點工作之一，聽聞新政府亦趁機檢視高官座駕有冇需要更換，最後決定拍板選用凌志行政級房車。消息指，由於政府購買新車係免稅，凌志GS450h售價只係四十幾萬元，但車廂內籠相比之前嘅福士或寶馬七系就較為細啲。有業內人士話，凌志新車適合個人揸多啲，但將佢用嚟做老闆車或者冇咁舒適。不過，車身裝潢豪華，包括有錶板投射跳字錶，加上新車又有原廠顏色供官員自行選擇，令高官座駕都增添少少人性化味道。
據聞最先受惠並非特首梁振英團隊中人，而係立法會主席曾鈺成，事關佢嘅LC1座駕之前用咗十年，等了又等終於趕上咗呢轉換車計劃。不過，有高官都坐緊新座駕，消息話運輸及房屋局局長張炳良同廉政專員白韞六等都有份，佢哋兩人不約而同揀咗平實嘅黑色。至於財經事務及庫務局常任秘書長區璟智則秉持自己平時嘅繽紛形象，連座駕都揀咗搶眼嘅棗紅色，唔知之後啲女高官換車時會否都揀番啲搶眼嘅顏色，等自己平時返工放工都心情開朗啲呢？
06年換車 成日壞車
還記得政府上次換車大行動要追溯到○六年底，購入近五十部德國生產嘅「輝騰」3.2L豪華房車，期間先後有多架新車行行吓就有事故要返廠維修，搞到事後機電工程署要全線檢視同型號車輛。事隔約七年後，當局購買新車又有否「停一停，諗一諗」，以及做好日後維修保養工作，避免新車落地就多多問題出現呢？大家想知嘅話，就要密切留意喇。