中環出更：馬唯中現身遊小巴河
台灣嘅總統馬英九女兒馬唯中近日傳出婚訊，盛傳佢放棄學業下嫁性感男模蔡沛然，仲喺香港定居添！卓妮尋日就咁啱見到馬唯中現身中環堅道，佢一身平民嘅打扮似足鄰家女孩，亦唔見有保鏢陪同，亦冇座駕接送，只係選擇搭小巴代步，獨個兒到香港大學嘅美術博物館參觀。直到夜晚九時許，男主角蔡沛然終於現身，見佢搭的士返到堅道愛巢，但未有回應任何問題，只對卓妮連番多謝及鞠躬後便返回樓上住所。
卓妮尋日行經堅道萬翠花園，咁啱就遇到蓄短髮、戴黑色膠框眼鏡嘅馬唯中，佢着住一件灰色印有唐老鴨圖案嘅衞衣，襯上牛仔褲同波鞋，揹上米白色帆布袋，打扮十分清純簡樸。卓妮無意中發現，佢左手無名指戴咗一隻戒指，睇嚟佢同蔡沛然嘅婚訊已成事實。見馬唯中獨個兒上咗架由薄扶林去中環碼頭嘅小巴，於是問吓佢去邊啦，佢並未有回應，但就對住卓妮揮手同微笑，之後就全程望出車窗外面。
小巴無耐就開到中環碼頭總站，但馬唯中冇落到車，行咗去車頭入咗張二十蚊紙落錢箱後，又再坐番埋位等小巴開番轉頭，最後佢終於抵達香港大學先落車，原來佢係想去位於港大馮平山樓嘅美術博物館。美術博物館樓高兩層，但馬唯中只係行咗半個鐘左右就離開喇，但今次唔係搭小巴，而係步行十分鐘返去堅道屋企。馬唯中到達屋企樓下時，又再同卓妮揮手講拜拜，真係有禮貌。
蔡沛然見記者說謝謝
直到晚上九時許，卓妮終於見到馬唯中另一半蔡沛然現身，佢落咗的士後，就急急腳行入大廈，佢見卓妮在場都好愕然，但依然好有禮貌連番講：「謝謝！謝謝！」仲要鞠個躬先返回住所，同馬唯中一樣咁客氣。
卓妮