前身係啟德機場嘅啟德發展區，之前傳過九龍城、黃大仙同觀塘三個區議會想爭奪，聽聞一切已經塵埃落定，啟德發展區繼續隸屬九龍城區議會範圍。不過，一波平定後一波又起，據聞啟德新區合共一萬多個公屋單位今年陸續落成入伙，呢個現兜兜有望新增至少兩個區議會議席嘅區域，吸引各大政團磨拳擦掌想快人一步插旗搶奪新票源。
聽聞目前最積極做準備工作嘅係民建聯（民記）同民協，消息指，民記早於去年底已接連發信跟進啟德新區配套問題，為咗更好服務新入伙居民，該黨最近更積極游說立法會議員蔣麗芸到啟德開辦事處，倘呢個部署如願以償，民記想搶灘意圖再明顯不過喇！
而另一個覬覦啟德新區票源嘅係民協。有地區消息透露，民協前深水埗區議會副主席譚國僑喺去年立法會選舉中，僅以數千票之差飲恨九龍西議席，民協對此深感不值，為免重蹈覆轍，增加票源可謂刻不容緩，所以有傳該黨超級議員馮檢基正徵求勇士衝入啟德新區，其中一個可能人選就係深水埗區議員黃志勇。民協不惜搵區議員踩過界都要插旗，證明佢哋冇咗九龍西議席有幾大打擊。