香港嘅環保回收比其他城市慢幾拍，坊間嘅環保團體或私人公司想盡辦法喚起市民響應回收，尋日社交網站就傳出一輯相，相中有班漫畫電影英雄，包括美國隊長、蝙蝠俠、蜘蛛俠同鐵甲奇俠，佢哋聲言要拯救地球，各人推住一個廚餘回收桶，將啲廚餘回收後再做肥料，用嚟耕吓田、種吓菜。原來呢班英雄係香港有機資源再生中心行政總裁倪漢順嘅朋友，佢話，佢班朋友不時都會打扮成咁做義工，咁啱佢哋早幾日去中心參觀，順便影相玩吓啫！