政情：公民講場：曾太監扮皇帝出巡

「貪曾」前特首曾蔭權爵士繼早前被發現勞師動眾到廣東辦年貨及遊玩後，日前微博又有網民再踢爆佢上星期四暢遊江蘇省高淳老街，點知今次仲離譜，竟然有廣東省港澳辦及接待辦官員全程陪住佢呢個退休「舊電池」玩，尋日仲有人發現佢去咗南京梅花園賞花添！貪曾在任時甘願做英國奴才嘅性格已經街知巷聞，如今佢已經卸任，但竟然仲夠膽用「前特首」身份到內地招搖，簡直係太監扮皇帝出巡，唔知醜字點寫。不過，最犯賤都係內地省市官員有正經事唔做，甘願「降格」陪住貪曾呢個退休貪官去遊山玩水，咁樣跨省公費旅遊，完全係腐敗同浪費公帑，好應該認真查辦同嚴懲。