政情：慢必爆大鑊邀高官出櫃
獲「翻閹」出任平等機會委員會主席嘅周一嶽（周一鑊），未上任已好冇品咁大爆身邊唔少同事、朋友都有不同性取向，引起全城嘩然。本港首名「出櫃議員」陳志全（慢必）為爭取性傾向歧視立法，尋日出席論壇嘅時候竟然再踢爆有唔少新舊高官，包括前局長、前副局長，甚至現任常任秘書長都係隱形同志，相信勢必會再引起「猜猜同志官員是誰」嘅熱潮。
慢必去年向本報公開承認其同志身份後，隨即成為同志們嘅「代言人」，四出演講支持同志平權運動。可惜嘅係，隨住撐同志旗幟鮮明嘅平機會主席林煥光（WK）即將卸任，下月接任嘅周一鑊就忽然轉晒口風，竟倒退為先研究、後諮詢，最後先考慮係咪立法，當堂辣慶慢必以及一眾關注同志平權嘅團體。
有現任常秘 前副局前局長
不過，慢必嘅矛頭只係指向周一鑊，事關佢開腔幫政府講好說話，透露政府其實對同志平權持開放態度，接手議題嘅政制及內地事務局局長譚志源，更曾喺私人場合向慢必暗示，打算喺特首梁振英首份施政報告「show hand」（晒冷），拍板就立法禁止性傾向歧視進行諮詢，可惜計劃最後喺部分宗教團體反對，埋門一腳被推倒。
講到「慶」起嘅慢必，更大爆官場其實不乏同性戀者，好似現任常秘、前副局長甚至前局長，都有唔少隱形同志，可惜部分人私下向佢透露，擔心一旦「出櫃」會烏紗不保，加上政府嘅態度係「隻眼開隻眼閉」，唔講當唔知，難怪一眾同志官員情願匿喺衣櫃入面，唔敢「come out」喇！
同志平權運動前途未卜，周一鑊接任平機會更令運動舉步維艱。慢必批評呢位前「拖政局長」任期只有三年，單係研究同諮詢都閒閒哋拖大家兩、三年，咁拖落去「三年之後又三年」，睇怕曾話過「希望有生之年見到同性婚姻合法化」嘅WK都好夢難圓。不過，慢必揚言會不惜一切挑戰周一鑊，包括邀請佢擔任來屆彩虹大使，接WK同佢嘅棒。