中環出更：顏明秀迷上泰拳 打走負能量
卓妮日前遇到中華廠商聯合會青委顏明秀（Candy），發覺佢身形愈來愈fit，原來佢近日愛上打泰拳，大讚修身效果一流，玩咗短短四個多月，全身線條靚晒，肌肉又結實咗好多，更可將身體嘅廢物排走，心內負能量一掃而空，可謂一舉多得。
fit咗又有滿足感
唔好睇Candy咁嬌小玲瓏，打泰拳絕不輸蝕，因為身體夠靈活，反而成為進攻嘅優勢。不過，Candy話自己手腳唔係幾協調，導師叫佢左手出拳，但佢就出咗右手，成日打中導師，令對方防不勝防，咁豈不是盲拳打死老師傅？以往少做運動嘅Candy話，自己條腰本身有舊患，早排腰痛復發，苦不堪言，佢於是的起心肝走去學打泰拳，強化體質。
Candy坦言，初學泰拳並唔容易，好似起飛腳踢沙包，踢到一雙腳都瘀晒，每次上完堂都攰到成身散晒。後來肌肉慢慢適應，佢開始享受流汗帶來嘅滿足感。佢仲話，依家唔少女仔都鍾意學泰拳，希望身形線條收得快，又可以減壓，做完運動個人都精神啲。
卓妮