中環出更：「舖王」孻仔投資亦有一手
「舖王」鄧成波（波叔）一向投資有道，其孻仔鄧耀昇（Stan）亦深受爸爸真傳，近年積極協助父親打理地產生意。現年二十七歲嘅Stan入行九年，一講產經就眉飛色舞，佢笑言由細到大，爸爸都愛捉住佢講地產，茶餘飯後，話題總離不開做生意嘅心得，睇嚟波叔好想傳授全副武功畀佢，繼承衣鉢。
Stan對上有四位兄長，最為人熟悉嘅係擔任東華三院總理嘅四哥鄧耀邦，感情亦較親密，另外三位年紀大一截嘅兄長則較為低調。波叔選中Stan接班，Stan就坦言：「可能我同爸爸思想比較近，所以特別啱傾，佢好錫我，每次我有活動，佢都會親自到場支持。」
地產婚宴統籌瓣瓣撈
Stan透露，家族自○五年開始，已逐漸將收購地舖模式，轉為收購整棟工廈、商場及商廈。佢認為，活化工廈潛力頗大，政府亦落力推動，只係發展商唔願意配合，皆因活化之後冇咗地舖同停車場，變晒做交通配套，感覺上好似蝕咗啲位，然而活化工廈呎價倍升，實際仲好賺。Stan特別睇好將工廈改建為酒店，而重建後嘅商場引入國際名店，能吸引更多人流。
Stan話：「爸爸一早預測到地舖價位暴升，買唔過，所以轉移視線活化工廈，成為目前主要業務。至於以前買落嘅地舖，大部分都喺升值兩倍後放售，剩下鰂魚涌、尖沙咀、觀塘等少數面積大嘅地牢及商場，博佢繼續升。」
至於Stan年前創辦嘅婚宴統籌公司，未來打算食住龍年生仔潮，撈埋嬰兒攝影，本月將擴建婚宴場地，並正物色舖位開五間分店。
卓妮