蘇東坡詞云：「十年生死兩茫茫，不思量，自難忘。」嗱，功夫茶唔係詩興大發，而係想提醒大家，今日係沙士爆發十周年吖！十年時間話短唔短，話長亦唔長，對於香港人嚟講，呢場沙士疫症就好似一場噩夢咁，依家提起仲心有餘悸，真係唔應該忘記o架。
十年前嘅今日，沙田威爾斯親王醫院8A病房爆發沙士，宣告噩夢開始。當時任職威院內科及藥物治療學系主管嘅沈祖堯回憶往事，仍不勝唏噓，佢話當時風聲鶴唳，淨係威院就有十一名醫生集體請病假，醫護界面對新病毒毫無頭緒，只能摸着石頭過河，一路嘗試，一路醫治。幸好有家人同市民嘅支持，每個醫護人員都表現出專業精神，「醫院內充滿天使」，最後終於戰勝疫魔，令香港起死回生。
眨吓眼十年過去嘞，依家嘅情形又點呢？沈祖堯慨嘆，香港人對沙士慘劇記憶猶深，可惜大家喺沙士期間學懂嘅公共衞生意識同團結精神，似乎已被遺忘，佢希望中東出現嘅新型冠狀病毒可以提醒社會，千祈唔好失去危機感。
冇錯嘞，「臨禍忘憂，憂必及之」，雖然沙士已成過去，但新沙士虎視眈眈，而禽流感等各種病毒亦一直揮之不去，香港時刻受到疫症威脅，點可以忘記教訓，失去危機感o架。
講到忘記教訓，其實最抵鬧嘅就係港產官僚。當年爆發沙士，除咗暴露唔少防疫漏洞，亦反映當局後知後覺，點知十年後嘅今日，情況唔只冇改善，有啲甚至更惡化添。就以威院嚟講吖，前線醫護人手短缺嘅問題愈演愈烈，急症室醫生流失率已達「恐怖」程度，上年度高達兩成；最慘係呢頭未能填補空缺，嗰頭下月又有四名駐院醫生逃亡，令醫生人手比編制嚴重短缺三分之一，夜更時分只有兩名醫生當值，搞到士氣低落，怨氣沖天。
威院係咁，其他公立醫院亦唔好得去邊，醫護人手嚴重短缺，已經到咗十個煲七個蓋嘅地步。喺咁嘅情況下，如果香港再爆發大規模疫症咯喎，真係不堪設想。
講到底，都係庸官累事。前食衞局局長周一嶽掌管醫療衞生咁多年，公立醫院就亂足咁多年，人手短缺、士氣低落、設備殘舊、事故頻生，甚至連雙非孕婦逼爆醫院等等，佢都闊佬懶理，拖得就拖，導致問題不斷累積，終於到咗爆煲邊緣。更離譜嘅係，周一嶽將公立醫院搞到烏煙瘴氣，亂象叢生，呢頭拍拍屁股走人，嗰頭又獲委任為平機會主席，你話港府係咪反智吖？係咪與民為敵吖？嗱，咪話功夫茶唔提醒，平機會本來已經醜聞多多，加上呢個廢官咯喎，遲早又係一周一鑊嘅咋！