政情：范國威撐限奶令句句「有骨」
新民主同盟立法會議員范國威（Gary）位於粉嶺華明邨嘅議員辦事處尋日開幕，佢準備咗缽仔糕、糯米糍、魚蛋及燒賣等地道小食宴請嘉賓，身體力行捍衞本土文化。Gary前日罕有掉轉槍頭，支持政府實施「限奶令」，更公然與公民黨同民主黨為敵，反對訂立「日落條款」嘅建議，莫非佢有「左傾」嘅意圖？
Gary第一時間伸冤，解釋自己早就向政府建議實施限奶令，直言「依家政府終於做嘢，我冇理由又反對咁冇政治道德o架！」擺明暗寸口口聲聲維護港人權益，但又反對禁令嘅政黨同議員。
現身撐場嘅仲有教協理事韓連山，原來佢同Gary一直有段不為人知嘅半師生關係。退休前任教天主教慈幼會伍少梅中學嘅韓連山自爆，八十年代Gary係該校嘅學生，雖然佢冇親身教過Gary，但盛讚Gary喺學生時代已經展現繪畫天分，不時幫學生會設計宣傳海報，正所謂「三歲定八十」，唔怪得Gary去年憑淋紅油抗赤化等出位招數，成功殺入立法會喇！