政情：陳振彬「飛起」李飛
全國人大政協兩會會議正進行得如火如荼，人大法工委副主任李飛尋日仲列席於港區人大小組會議。不過，首次當選港區人大嘅青年事務委員會主席陳振彬（Bunny）就飛起李飛，前晚漏夜搭飛機趕返香港，究竟有乜事重要到非回港不可呢？原來佢係要出席民政事務局舉辦嘅優秀青年嘉許禮，支持一班優秀嘅青年人。
一年前已約定
Bunny話，呢個活動一年前已經約定時間同地點，當時又唔知自己會做咗人大，加上又應承過班青年人會親自頒獎畀佢哋，佢曾經試過同主辦單位傾可否改期，但由於場地問題，所以決定提前一晚搭最夜一班機返港，但活動後就要隨即飛返北京咁話。
雖然只係返港一日，但Bunny絕無偷懶，事關佢前晚半夜返到屋企，翌日又要一早起床，詳讀全國人大常務委員會工作報告，然後寫埋建議，等尋晚返到北京可以交功課喎。