政情：陳百里做官被「押後」
觀塘區議員陳百里早已篤定加入政府問責團隊，出任商務及經濟發展局政治助理，聽聞佢嘅委任程序早於農曆新年前後已經完成，連美國國籍都放棄埋，但偏偏強調「成熟一項就推一項」嘅特區政府，至今都未公布有關消息。有傳陳百里嘅任命被押後，居然同遠在新界東嘅沙田區議會田心選區補選扯上關係。
塵埃落定始公布
陳百里明明係觀塘區議員，佢做唔做官同幾時做官，點解又會同田心補選有關呢？事緣田心選區之所以要舉行補選，係因為該區嘅原區議員劉江華中途走咗去做官，出任政制及內地事務局副局長，按法律需要辭任區議員一職，所以先要選過。
咁啱陳百里同劉江華都係民建聯（民記）成員，政府擔心臨近補選投票日公布陳百里任命，會令當區選民引起不必要嘅聯想，因此最好等到補選塵埃落定，有晒結果後先至公布，以免畀人口實。
政府須步步為營
不過事實上，民記根本無派人參選今次補選，建制派嘅代表係公民力量嘅潘國山，但泛民就針對潘國山同劉江華關係密切，強行將劉江華筆帳算埋落潘國山度，喺區內作出大量負面宣傳，因此政府今次做事小心啲，都係可以理解。
田心選區一向由建制派佔優，但潘國山對今次選情亦不敢怠慢，尋日喺社交網站上載獲多位建制派立法會議員力撐嘅告急宣傳短片，莫非佢選情真係咁危急？可以肯定嘅係，泛民視今次補選為「光復」田心選區嘅千載難逢機會，分別有民主黨丁士元同人民力量林匡正兩個參選，硬拼潘國山同獨立候選人蘇佩琳。補選最後鹿死誰手，今晚自有分曉。